गुगल रिडरची नवीन सोय

विश्वजाळावर अनुदिनींचा सागर पसरला आहे. अगदी निवडून घ्यायच्या म्हटल्या तरी चांगल्या अनुदिनींची संख्या शेकड्यांच्या घरात सहज जाते. त्यातच एखाद्या वाचकाला नानाविध विषयांची गोडी असली तर विचारूच नका. अक्षरशः रोज हजारो लेखांच्या रांगोळ्या बनतात. दररोज एका नवीन गलेलठ्ठ पुस्तकाचे वाचन करण्यासारखाच हा प्रकार आहे. या कामी वाहिनीवाचकाचा (फिड रिडरचा) प्रचंड उपयोग होतो. त्यातील मला सर्वोत्कृष्ट वाटणारा वाहिनीवाचक म्हणजे गुगल रिडर हा आहे.

गुगल रिडरमध्ये आपल्याला आवडलेल्या लेखांचा संग्रह करण्याची सोय आहे. तसेच हे लेख इतरांना उपयुक्त होऊ शकतील असे आपल्याला वाटले तर आपण त्या लेखांना खूण करून ठेऊ शकतो. अशा सगळ्या खूणा केलेल्या लेखांची गुगल रिडर एक स्वतंत्र वाहिनी आपसूकच प्रकाशित करते. उदाहरणार्थ मी खूणा केलेल्या इंग्रजी लेखांची वाहिनी येथे आहे -

http://www.google.com/reader/shared/06583955421310467659

नुकतीच गुगल रिडरमध्ये एक नवीन सोय उपलब्ध झाली. गुगल मेल किंवा गुगल टॉकमध्ये असलेल्या आपापल्या मित्र-मैत्रीणी जर गुगल रिडर वापरत असतील तर त्यांनी खूणा केलेले लेख आपोआप तुमच्या वाचनयादीत येतात. चांगल्या सोबतीचा फायदा होतो तो असा,

गुगल रिडरची आज्ञावली विकसित करणा-या चमूमध्ये कुणी मराठी वाचक असतील तर त्यांना एकच (विनंतीसम) सूचना करावीशी वाटते – सर्वप्रथम या सोयीसाठी मनःपूर्वक आभार! मी खूणा करून ठेवलेले लेख गुगल रिडर वापरणा-या माझ्या सर्व मित्र-मैत्रींणींच्या वाचनयादीत जातात ही उत्कृष्ट गोष्ट आहे. मात्र त्यापैकी सर्वांनाच मराठी किंवा हिंदी येत असेल असे नाही. तसेच माझे आवडत्या इंग्रजी लेखांच्या यादीऐवजी केवळ मराठी लेखांच्या यादीतच त्यापैकी काहींना रस असेल. सध्या खूणा केलेल्या सगळ्याच लेखांची भेसळ होते. त्यामुळे कृपया भाषानिहाय स्वतंत्र वाहिन्या प्रकाशित होण्याची सोय असावी.

दुवा – http://googlereader.blogspot.com/2007/12/reader-and-talk-are-friends.html

(शैलेश श. खांडेकर)